_8224082.JPG

A  finais do ano 84 fórmase en Cangas a asociación cultural Lembranzas da Ría, baixo a dirección de Xosé Menduíña Bastón, antigo compoñente do grupo Brisas da Terra de Santiago de Compostela. Nun principio xorde como grupo parroquial que adica especialmente a actividades culturais na comarca do Morrazo, pero co paso do tempo vai facer que os seus compoñentes acaden unha pequena inquietude coa nosa tradición. É deste xeito como nace dentro deles unha curiosidade e un interese por manter vivas as nosas raíces. Empréndese, entón un traballo de campo baseado na recuperación de bailes, cantigas e músicas percorrendo as aldeas de toda Galicia, onde o baile e maila música, xunto co traballo, formaban parte da vida diaria. Froito deste labor de campo é o repertorio de bailes e músicas que o grupo pode mostrar ó público, intentando en todo momento plasmar da mellor maneira posible o aprendido polos seus informantes. Pezas recollidas polas aldeas de toda Galicia á xente que formou parte na súa época nas fiadas ou muiñadas, nas que o baile e a música xunto co traballo eran parte do pobo.

 

Entre as recuperacións que fixemos cabe destacar a da Danza de Darbo, declarada de interese cultural, que se celebra todos os ano o 8 de setembro no adro de Darbo.

Co paso do tempo a inquedanza por mostrar o noso folclore é maior e amplía as súas actuacións, mostrando o folclore da nosa terra non só por toda Galicia senón tamén por fóra dela.

curriculum2BigDende o ano 1994 ata agora é un dos bailadores, Manolo Cobas, quen dirixe o grupo. No seus ensaios intenta que os alumnos cheguen a identificarse co baile para poderen logo expresarse mediante el.

No apartado de gaita o encargado de formar gaiteiros e cuartetos é Roberto Sotelo, traballa cun repertorio maioritariamente tradicional. A finais do ano 2002 constitúese a formación de Charanga.

A A.C. Lembranzas da Ría tamén conta co grupo de Pandereteiras dirixido por María García Santomé

Dende o ano 2006, a A.C. Lembranzas da Ría amplía a súa escola ofrecendo as actividades de gaita, percusión, baile, acordeón, pandeireta e canto, para maiores e pequenos.